వికారాబాద్ : సాధారణంగా సభను నడిపించే స్పీకర్‌గా కనిపించే తెలంగాణ శాసనసభాపతి, వికారాబాద్ ఎమ్మెల్యే గడ్డం ప్రసాద్ కుమార్ చేతిలో గన్ కనిపించడంతో అక్కడున్న వారంతా ఒక్కసారిగా ఆసక్తిగా చూశారు. పోలీస్ శాఖ ఏర్పాటు చేసిన ఆయుధ ప్రదర్శనలో భాగంగా ఆయన తుపాకీని చేతబట్టి పరిశీలించిన దృశ్యం ప్రస్తుతం ప్రత్యేక ఆకర్షణగా మారింది.
పోలీస్ ఆయుధ ప్రదర్శనలో గడ్డం ప్రసాద్ కుమార్ సందడి.. తుపాకీ పట్టుకుని పరిశీలన..
పోలీసుల వద్ద ఉన్న ఆయుధాలు, రక్షణ పరికరాలను పరిశీలించిన స్పీకర్.. వాటి పనితీరును అధికారులను అడిగి తెలుసుకున్నారు. అయితే గన్‌ను చేతిలో పట్టుకున్న సమయంలో తీసిన ఈ ఫొటో మాత్రం కార్యక్రమంలోని మిగతా దృశ్యాలన్నింటినీ మించి సోషల్ మీడియాలో చర్చనీయాంశంగా మారింది.
సభలో చట్టాలపై గళం వినిపించే స్పీకర్.. పోలీస్ ఆయుధ ప్రదర్శనలో గన్ పట్టుకోవడం ఆసక్తికరంగా మారింది. ప్రజా భద్రత కోసం పోలీసులు ఎదుర్కొనే సవాళ్లు, వినియోగించే ఆధునిక ఆయుధాలపై అవగాహన కల్పించడమే ఈ ప్రదర్శన ఉద్దేశంగా అధికారులు వివరించారు.
గడ్డం ప్రసాద్ కుమార్ గతంలో కూడా రహదారి భద్రత, మాదకద్రవ్యాల నిర్మూలన వంటి అంశాలపై పోలీస్ శాఖ కార్యక్రమాల్లో పాల్గొని ప్రజలకు అవగాహన కల్పించారు. “స్పీకర్ చేతిలో గన్.. వికారాబాద్ లో ఆసక్తికర దృశ్యం!” అంటూ ఈ ఫొటోను చూసిన పలువురు చర్చించుకోవడం విశేషం.