ప్రేమ వివాహం వివాదం..!

📰 Generate e-Paper Clip

• యువకుడి హత్య కేసును ఛేదించిన గోల్కొండ పోలీసులు
• నలుగురు నిందితుల అరెస్ట్.. రిమాండ్‌కు తరలింపు

ఆదాబ్ సైబరాబాద్, హైదరాబాద్: ప్రేమ వివాహం నేపథ్యంలో చోటుచేసుకున్న సంచలన హత్య కేసును గోల్కొండ పోలీసులు ఛేదించారు. గోల్కొండ పోలీస్ స్టేషన్ పరిధిలో నమోదైన క్రైమ్ నంబర్ 229/2026 కేసులో నలుగురు నిందితులను అరెస్ట్ చేసి న్యాయస్థానం ముందు హాజరుపరచగా, కోర్టు వారిని జ్యుడీషియల్ రిమాండ్‌కు తరలించింది.

పోలీసుల వివరాల ప్రకారం, మృతుడు షేక్ మహబూబ్ మసూద్ చాందీ తండ్రి ఫిర్యాదు మేరకు కేసు నమోదు చేశారు. నిందితులు ఇంట్లోకి బలవంతంగా ప్రవేశించి ఆయన కుమారుడిపై ప్రాణాంతక ఆయుధాలతో దాడి చేసి హత్య చేసినట్లు ఫిర్యాదులో పేర్కొన్నారు.

దర్యాప్తులో భాగంగా వెలుగులోకి వచ్చిన వివరాల ప్రకారం, మృతుడు 2025 జనవరిలో ప్రేమ వివాహం చేసుకున్నాడు. ఈ వివాహాన్ని మృతుడి భార్య సోదరుడు షేక్ జాహెద్ అలియాస్ సోహైల్ (ఏ1) తీవ్రంగా వ్యతిరేకించాడు. వివాహం అనంతరం రెండు కుటుంబాల మధ్య విభేదాలు మరింత తీవ్రమై పగ పెరిగినట్లు పోలీసులు గుర్తించారు.

ఈ క్రమంలో వ్యక్తిగత కక్షతో ఏ1 షేక్ జాహెద్ అలియాస్ సోహైల్, జీషాన్ నవాబ్ అలియాస్ జబేర్ (ఏ2), అమీర్ నవాబ్ అలియాస్ లడ్డూ (ఏ3), నఫీజ్ సుల్తానా (ఏ4) కలిసి మృతుడి ఇంటికి చేరుకుని ఇనుప రాడ్లు, కత్తులు, కర్రలతో దాడికి పాల్పడినట్లు దర్యాప్తులో తేలింది. ఈ దాడిలో మృతుడు తీవ్ర గాయాలపాలై ప్రాణాలు కోల్పోగా, అడ్డుకునేందుకు ప్రయత్నించిన కుటుంబ సభ్యులు కూడా గాయపడినట్లు పోలీసులు వెల్లడించారు. విశ్వసనీయ సమాచారం ఆధారంగా గోల్కొండ పోలీస్ స్టేషన్ డిటెక్టివ్ ఇన్‌స్పెక్టర్ నేతృత్వంలోని ప్రత్యేక బృందం, టోలిచౌకీ డివిజన్ ఏసీపీ సయ్యద్ ఫియాజ్ పర్యవేక్షణలో నిందితులను గుర్తించి జూన్ 13న అరెస్ట్ చేసింది. దర్యాప్తులో భాగంగా ఘటనలో ఉపయోగించిన ఇనుప రాడ్, కత్తి తదితర ఆయుధాలను స్వాధీనం చేసుకుంది. సంచలన హత్య కేసును వేగంగా ఛేదించి నిందితులను చట్టం ముందు నిలబెట్టిన గోల్కొండ పోలీసుల పనితీరును ఉన్నతాధికారులు అభినందించారు.